عوض شكسبير يفجر مفاجأة من العيار الثقيل ويعلن ملكيته لفكرة مسلسل سكة ضياع ومخرج المسلسل يرد بعنف

فاجأ الممثل والسيناريست عوض شكسبير، المتابعين بإعلانه ملكية فكرة

وتأليف مسلسل “سكة ضياع” الذي يُعرض الآن على أنه من تأليف مخرجه هيثم الأمين، الأمر الذي دعا بطل العمل أحمد الجقر ينبري للدفاع عن نفسه وهيثم ونفي رواية شكسبير.

حبل السر
ووفقا لراوية عوض شكسبير فإن المسلسل من تأليفه بذات السيناريو والأحداث وكان من المفترض أن يرى النور تحت اسم “حبل السر”.
شهران من الكتابة
بطل العمل، الفنان أحمد الجقر نفى الأمر تماما وشدد على أن السيناريو من بنات أفكار مخرج العمل هيثم الأمين، وقد كتب الجقر في توضيح هذه الفقرة “هذا الهيثم قاعد بكتب في السيناريو دا قريب الشهرين”.
طلب مناظرة
وكان أول ما بدأ به عوض شكسبير حديثه عن امتلاك فكرة العمل، هو طلبه بمناظرة مع هيثم الأمين، وكتب “أطالب بمناظرة جادة بيني وبين الشاعر هيثم الأمين حول أحقية فكرة وتاليف مسلسل (حبل السر) سكة ضياع.
اتهامات للجقر
منشور شكسبير لم يشمل هيثم الأمين وحده، بل حوى كذلك اتهامات لأحمد الجقر بقوله: لقد صبرت كثيرا، فقط نريد إثبات الحق وإعادة الحقوق لأهلها وماهكذا تساق البعير يا صديقي أحمد الجقر.
نفي وقسم
ولجأ الجقر للقسم بالله لتأكيد نفيه لرواية عوض شكسبير وقال: “ياخي حبل السر دا شنو هو؟، أقسم بالله العظيم في هذا الشهر الكريم وأنا صايم لم أسمع به إلا من خلال بوستك دا، وهل انت أديتني سيناريو في يدي وقلت لي هاك الورق دا أمشي أقراهو أنا عاوز أعمل مسلسل”.
تواجد ميرفت الزين
واستند أحمد الجقر في دفاعه عن مسلسله على نقطة تواجد الأستاذة ميرفت الزين برفقتهم في وقت التحضير للمسلسل وانسحابها في خطوة التنفيذ لخلافات مالية، والمعروف أن الممثلة ميرفت هي زوجة عوض شكسبير، وقال عنها أحمد: كانت حاضرة كل البروفات قبل المسلسل ينزل وياما اتناقشنا فيها وسمعت الفكرة كاملة، وواصل: بالمنطق كدا لو في فكرة مسروقة أنا بجيب زوجتك بوريها إني سارق فكرتك، وأجيبها تمثل معانا كمان؟.
نجاح وحسد
وألمح أحمد الجقر لأن ما ذكره شكسبير يندرج تحت بند الحسد، وقال “انا والله العظيم صراحة ما محبط لأنه النجاح النحن فيهو دا لازم نحسد عليه” وقال في فقرة أخرى “ما مستغرب التصرف دا ولسة متوقع الأسوأ لأنه النجاح دايما بجيب معاهو حاجات زي دي
فيما علق مخرج المسلسل هيثم الأمين علي صفحته بالفيس بوك بقوله

انا علي قدر تجربتي في عالم الفن والفنون كنته بسمع جملة ان النجاح عنده ضريبه صعبه وفاتورة النجاح دايما بتكون غاليه صراحه ماكنته بركز في الجمله دي او بقيف عندها في الفتره ديك لانه الواحد كان يادوب بتلمس في خطاويه وكان بالنسبه لي النجاح مناال وهدف بعيد بس كنته مقتنع بي اجتهادي وعزيمتي ح اصل في يوم وان مافي شي مستحيل، ورغم حداثة التجربه في الفتره ديك لكن كنته مسكون بروح الفنان روح الفنان دي الكانت بتخلينا نفرح لنجاح تجارب الاخوان ونكون دايما من السباقين ليهم بالمباركه، كنته بتبسط شديد جدا لنجاح تجارب الغير البعرفهم والغير بعرفهم لانك كفنان حقيقي لاشعوريا بتلقي نفسك عامل كده لاشعوريا بعجبك سمح الغير، نجاح الزميل طاقته الايجابيه كانت بتكمن في اني بمني نفسي بنجاح مماثل ليه، طاقته الايجابيه كانت بتديني قوه عشان اجتهد اكتر وابقي زي فلان الناجح ده، وعمره النجاح ده ما اتبلور بغيره او بحقد او بحسد بالعكس كان اكبر دافع لي عشان اجتهد اكتر في سبيل تحقيق اهدافي وطموحي، والحمدلله طوال مشواري وتجربتي الفنيه دي الانا بديتها كا كاتب وشاعر وملحن ومن ثم دراسة الاخراج وممارسته كمهنه ماحصل اتغولته علي فكرة زميل او حصلت مشكله من هذا القبيل وايا كان عمر التجربه دي كنته ومازلت فخور بيها جدا وفخور بكل مشروع قدمته فيها وفخور بكل تجربه وثنائيه عشتها فيها، ده تعريف بسيط للاصدقاء في بروفايلي وللناس الممكن تكون مابتعرف هيثم الامين شخصيا او عرفت هيثم الامين من خلال سكة ضياع ككاتب ومخرج للعمل ده، اما بالنسبه للناس القريبين والاصحاب علي الصعيد الشخصي فهم بعرفوا منو هيثم والطريقه البفكر بيها هيثم، بالنسبه لبوست الفنان عوض شكسبير والاتهامات الاتوجهت لشخصي انا صراحه مستغرب ان السلوك ده يصدر من شخص فنان وصاحب تجربه كبيره غض النظر عن وجهة نظري الشخصيه في التجربه دي وفي الشي القدمته لكن يظل رجل صاحب تجربه، الفنان الحقيقي ياعوض شكسبير بفرح لنجاح تجارب غيره بكل حب وطيب خاطر، الفنان الحقيقي مامحتاج ينسب نجاحات الغير لشخصه بالتجني والتسلبط، هيثم الامين ياعزيزي مامحتاج يسرق فكره منك عشان ينجح بيها، هيثم الامين لمن كتب سكة ضياع ماعمل حاجه غير ان طلع الشارع وشاف بي عينه الواقع الحاصل في الشارع السوداني وكتب عنه بكل صدق وبكل واقعيه، والحمدلله واقعية العمل كانت السبب الاساسي في نجاح العمل وفي قبوله من الناس، اسئله بسيطه اتمني من صاحب الادعاءات الاجابه عليها بصدق حتي لو بينه وبين نفسه يعني هل انت كنته منتظر ان المسلسل يصل للحلقه 19 عشان تفصح عن ادعائك المزيف ده، يعني هل كنته منتظر سكة ضياع تنجح عشان تجي تقوم تعلن ملكيتك للقصه الانت اصلا ماعندك بيها علاقه، طيب هل انا اعتبر نفسي اللص الغبي باعتبار اني سرقته فكرتك وقمته جبته زوجتك الاستاذه ميرفت الزين عشان تمثل معاي في المسلسل واللي هي كانت مباشره معاي في البروفات لحدي اخر لحظه وتم الاستغناء عنها فيما بعد نتيجة لمغالاتها في اجرها المادي وطلبها زيادة الاجر بعد ما حصل الاتفاق المبدئي بيناتنا، يعني مهما بلغته من غباء هل ممكن اسرق فكرتك واستعين بي زوجتك اللي هي كانت متحمسه للعمل وحابه الفكره، ياعوض ياخ صراحه انا حاليا بشفق عليك جدا وطالما انت نجاح الغير بتعبك لدرجة انك تخرف بالتراهااات اذن معناها انت الفتره الجايه حتتعب مني شديد ومن ابناء جيلي من كتاب ومخرجين ودرامين حتتعب لانه جيلنا ده باذن الله الجيل الحينتشل الدراما السودانيه دي من القاع الكنته حابسنه فيها الي العالميه باذن الله وتوفيقه وبي محبة الناس البتدعمنا والناس البحبونا، خلونا نحنا نكتب ونألف ونخرج وخليكم انتو قاعدين بتنسبوا نجاحاتنا ليكم، وياجميل بتمني ليك مشاهده طيبه لماتبقي من حلقات مسلسل سكة ضياع وبقول ليك بي صوت ابو الدبش
اصحيييييي يااااا