أنا (سودانية) وظهوري براهو (عظمة) وطنية
صرفت (نظر) عن الجدل، وضعي ومكانتي مابتسمح
الشكر لجمهوري الحبيب، وللناس النواياه (بيضاء)
ضجت مواقع التواصل وثار الجدل في الفترة الأخيرة إبان مشاركة الفنانة السودانية ذائعة الصيت ندى القلعة على ضوء مشاركتها الخارجية بدولة الإمارات المتحدة البعض انتقدوا ادائها فيما يتعلق بالنشيد الوطني السوداني واخرون علقوا على جوانب أخرى جلسنا معها وقمنا بنقل وطرح كل التساؤلات المتعلقة بالمشاركة فكانت جريئة اكثر موضوعية في الرد.
مارأيك في الجدل الذي صاحب، مشاركتك الخارجية، مؤخرا
بالإمارات؟
انا لا أركز كثيرا في ردود الأفعال آخذ الإيجابي من كل فعل واتجاوز الطاقة السلبية وردود الأفعال السامة غير المبنية على فكرة داعمة وتحليل سليم مررت كثيرا من قبل بمثل هذه الزوبعة وفي مرات أصعب من ذلك تجاوزتها لاني (عارفة نفسي دايرة شنو وداير أ صل لي وين ولو ماكده ماكان ٢٥سنة موجودة في مقدمة الساحة).
البعض يرى ان الأداء لم يكن موفقا؟
(ربما) دي وجهة نظر والفن بتحمل الرأي والرأي الآخر ولكل مناسبة ظروف
اذا ماتعليقك عليه؟
مبسوطة وراضية تماما عن ماقدمت يكفي اني مثلت بلدي في مناسبة مشاركين فيها كتير من بلدان العالم في وقت وظروف نشكو فيها من اننا كسودانين ماقادرين نوصل ابداعنا ومبدعننا الي الخارج مجرد ظهور ظهورنا يكفي ودي (عظمة) وطنية لبلد وشعب وتراث وقيم و(حاجات كتيرة) تخلينا (نشيلوا فوق راسنا)
وجدل اخر كان في شكل الهندام (الثوب) ؟
شاركت بالتوب السوداني وهو عزتنا وفخر لنا كنت حريصة على الظهور بهذا الشكل الذي اعتبره كان لائقا (التوب هويه.. التوب قومية. التوب الحضارة) انا زولة اصيلة وبت بلد، ومابغلبني افرز بين اللائق ومالائق لكن نقول شنو (اي زول فاضي.. عامل نفسوا قاضي)
الهجمة الشرسة ماذا تسميها إستهداف أم غير ذلك؟
ما قاعدة أركز في ردود الأفعال الناس البصنعوا الحدث مابركزوا في التفاصيل والزوبعة دائما بعملوا (ضعفي القدرات) عشان يركبوا الموجة عموما ٢٥سنة ومازلت صامدة وفي المقدمة
كيف تعاملت معها ؟
صرفت نظر عن الجدل.. وضعي ومكانتي مابتسمح لي بالمهاتره انا برضو عندي تأريخي والأهم برضو مركزة في حاجات اهم.
كما أن هناك من استنكر شجبك للطفل عبر اللايف التوضيحي الذي قمتي به؟
شديد، طبيعي.. نحنا ما مثاليين اي زول بكون مركز في حاجة ومشدود ذهنيا بكون في الوضعية دي وفي الاخر من يدخل عليك من باب المحبة يرى ان كل ماتفعله جميلا.. ومن يدخل عليك من باب السوء يرى ان كل ماتفعله سئ.
رسالة تودين ايصالها عبر هذه المساحة؟
كل التقدير والمحبة والانحناءة لجمهوري الحبيب الجمهور الداعم والمختلف في كل شي كل الشكر للاقلام الكتبت بالحق وللناس البتقدر قيمة الإبداع وبعترف معناها شنو نقد والشكر ليك.
