حد السيف- محمد الصادق – نجمه نجمه الليل نعدو

0 غايتو انا اول مره اعرف السودان ده والسودانيين ديل من جوه كده شديد ايام التعداد السكاني ديك تتذكروها …!!! مش قالو فى متطوعين كده هم البعدو الناس …اها انا كنت المتطوعين ديل …يازول لافين من بيت لى بيت نشيل ونعد وفى كل مره تقابلنى قصة وحكايه تستحق ان تروى حاحكي ليكم تلاته مشاهد ….
المشهد الاول
دقينا ليك الباب ..!! جاتنا مره كده كبيره ..اهلًا حبابكم ..!! انتو منو ..!!؟ قلتا ليها نحن ناس (الإحصاء) اقصد التعداد ياحجه …!! قالت لى (التاج ) منو ..!! قلتا ليها مالتاج ..!! التعداد …التعداااد ..!! يعنى العدادين …هيا اخوانا لاكين أقول ليها شنو …!! قلتا ليها …لا …يعنى نحنا جايين نعدكم …!! نشوف انتو كم …!!! والله عاينت لى كدااا… قالت لى خلاص خليتو شغلتكم كووولها ….دايرين تحسبونا كم ..!! حمدت الله انها بس عرفت نحن دايرين شنو ..!! اها ما اشتغلتا بى كلاما الباقى قلتا بسسس نحنا جايين نعدكم …!! وتعدونا لى شنو ..!!!؟؟ سألت مستفسرة… وهو سؤال منطقى وعلوب حاضر للإجابة…!! نعدكم ياحاجه عشان نعرف عدد السودانيين كم ..!
قالت لى الجوه ولا البره ..!!؟ (صفعتنى بهذا السؤال غير المتوقع …!! ) قلتا ليها لا …الجوه بس …ههههه ( ضحكة كده لتلطيف الأجواء..!! ) والله ولا كشكرت لى بى ابتسامه …!! اها وبعد ماتعدونا …!!!؟؟ قلتا ليها ايواااا سؤال وجيه …!! نعدكم عشان نعرف عددكم …!! اها وبعد ماعرفتو عددنا …!!؟ سؤال أجمل ..!! وفى محلو ..طوالى انبريت حسب الدورة الاخدناها (بالمناسبة الدورة كانت مدتها ساعة ونص …) عشان الحكومة تقدر توفر ليكم الخدمات حسب عددكم ده ..ويكون عندها قاعدة بيانات …(قاعدة بيانات شنو ياعلوب انتا كمان ….شنو الغباء الانت فيهو ده ..) هى التعداد ماعرفتو ليك …)غيرت الكلام طوالى قلتا ليها يعنى يكون عندها معلومه انو انتو عددكم كم ..!! والسودان كلو عددو كم ..!! وبى كده الحكومة تكون عارفه هى بتصرف على كم بنى آدم …!!! والله ياخوانا المره دى سمعت كلامى ده كلو ….!! قالت لى هسه الحكومة دايره تعرف نحن كم ..!! عشان توفر لينا الحاجات ..!! اتكيفتا كيف انها فهمتنى …!! قلتا ليها أى نعم ….!! قالت قسم المولى قاسى ….والله ووالله …تانى كان ساكت شفتك لافى بى هنا قسمتا بالله الا أدقك بى يدى دى …!! امشى تمشى بطنك ..كان عندك شغلا اقضاها …قال الحيكومه توفر ليكم ..!!! هى وينا الحكومة دى بس فلاحتا فى الشيل واللفحى …انت مما الله ده خلقك شفت ليك حكومة أدت …!! يديك المرض اليهرسك ..!! امشى من هنا تمشى من ضلك …وقول ليهم حاجه (كتيره ) طردتنا ..خلى الحيكومه التجينى هنا انا ذاتى كايساها ….وكوووو رزعت الباب فى وشى ….!!! والله ياجماعة انا بس صبت فينى مطره ….!! طوالى طلعتا ليك كراسى بتاع التعداد الصرفو لينا …وكتبت من راسى ده ….منزل ١١٩ ..عدد أفراد الاسرة سبعة …ثلاثة ذكور …وأربعة أناث …وعلى القسم مفروض حاجه كتيره دى اكتبها براها أربعة ذكور …كيفتنى فى حنانى الحاجه دى ….مبروك ياكتيره والله مكانك وزيره …..
مشهد تانى ..!!
ديل مشينا نعدهم لقيناهم بفطرو …يازول حرام وحليفه وطلاق الا نفطر معاهم …معاى واحده كده وهى برضو موظفه فى الحكومة ومشرفه على الإحصاء … قدر ما اعتذرنا وقلنا ليهم نحن شغالين …قالو نحن حلفنا ..!! معقوله صينية الفطور فى قدامنا وماتفطرو …الكلام ده ماعيب ..!! والله مانعد ..!! لو مافطرتو ….يازول امام هذا السيل من الإصرار طوالى قعدنا الفطور …!! ضربنا ليك الفول والبيض والسلطه مع الجماعة ديل..وهم يازول هم فرحانين بينا شديد… هم من النوع داك البحب الضيوف ..!! وجرو جابو بيبسى من الدكان …!! يازول والشاى دور …(انا ذاتى نسيت نحنا جايين لى شنو ..!! ) وطلعت الموظفة الجات معاى دى عندهم بيها علاقه كده …نسابه ولاشنو ماعارف ..المهم دخلت مع النسوان جوه …وانا هنا مع الرجال ديل ونسه شديده وجبنا سيرة الهلال والمريخ ودخلنا فى نقاش ..ومرات نقاش حاد …!! وجات القهوة ..!! وانا اخدت لى تكيه فى السرير … ورشو الحوش ..عندهم مكيف مويه ساااقط شغال ..وريحة البخور …والله النعسه الدخلتنى مامرقت ..!! خلاااص حيلى بقى ماشايلنى …الراجل قال لى ياخ ماتاخد ليك تكيه ..اصلو بعد ده ما أظن تقدرو تمشو ..!! قلتا ليهو ليه خير ..!!؟ قال لى (سعديه ) دى الظاهر النسوان مسكوها (تتحنن ) معاهم ..انتو قايلين سعديه دى منو …سعديه دى الموظفة الجات معاى ….!! سعدية دخلت تتحنن …..!!!!! .. …طوالى طلعتا كراسى وكتبتا منزل رقم ٣٢٠ ..!! قلتا ليهم عددكم كم انتو …قال اى حاجه تجى منك كويسه ….قلتا ليهم نقول تسعة .. قالو لى ماكتيره ..!! كمان يدونا عين …طوالى عملتا ليهم تخفيض ..وكتبتا عدد أفراد الاسرة ….سبعة …أربعة ذكور وتلاته نسوان بمية راجل …وسعدية دخلت تتحنن ..!!!
مشهد اخير …
دقيت الباب كده طوالى فتح لى راجل صبوح كده كبير شويه فى السن ..سلم على بحرارة وصوتو هادئ قلتا ليهو نحنا ناس التعداد قال لي ايوه واضح من الشعار ألفي لبستك دى ..قلتا ده تمام ..اها انتو عددكم كم ..!!؟ قال لى معقوله كده فى الباب اتفضل .. ياوهيبه …(قال لينا وهيبة دى زوجتى …) كورك ليها تعالى ..ديل إخوانا ناس التعداد …وهيبة لبست توبا وجات سلمت علينا ..الحقيقة لاحظتا البيت كلو لوحات قلتا ليهو الظاهر بتحب الفنون قال لى انا فنان تشكيلى ودى لوحاتى ..(.الحقيقة لوحات قمة فى الجمال …) قلتا ليهو ماشاء الله ..حاجه رايعه..!! وماناخد من زمنكم ..!! اها عدد أفراد الاسرة… قال لى اتنين…!! شافنى اندهشتا كده قال لي مالك نحن اتنين انا ووهيبه دى الحقيقة ماعندنا اولاد ربنا ماقسم لينا …انا شعرتا كده بشوية احراج وهو لاحظ ..!! قال لي ماتتحسس انا ووهيبه دى متزوجين لينا تمنتاشر سنة …والله على اجمل مايكون واخد ليهو ضحكة كده قال لى بالله مره عظيمه ذي دى مش حرام يشاركوك فى حبها اولاد …وهيبه قربت تبكى …وفعلا انا لاحظتا انو نص اللوحات المرسومة دى كانت لى وهيبة
والله انا ذاتى داير ابكى …ياخ ديل ناس عظيمين ..!! جابو لينا عصير واتونسنا معاهم والراجل اهدانى لوحة وودعناهم بحب ….!! وطوالى طلعتا كراسى وكتبتا منزل ١٢٠ عدد أفراد الاسرة …لوحتين ..انتو مابعدوكم انتو
ببروزوكم …
بالله دى أمة يعدوها ..!! ديل ناس يعددو خصالم وبس ….اتذكرتا حاجه (كتيره …) وياهو داك الكراس خاتيهو فى الدولاب ذكرى عطره من هذه التجربة ..والسودان أغلى وطن ..لابنعد لا ليهو تمن … وسعديه دخلت تتحنن ..!!
0 أعجبتنى وأضحكتنى حد الضحك فأردت مشاركتم معى فيما نقلته من يوميات علوب للزميل والصديق الأستاذ الطيب عبد الماجد .
0 غدا بمشيئة الله نواصل إن كان فى العمر بقية . والله من وراء القصد .