حد السيف محمد الصادق أمدرمان بلد الدرر والأمان ( ٢ – ٣ )
0 عندما تمسك بالقلم وتود أن تحبر به سطورا عن الحبيبة أمدرمان تتردد كثيرا فى ماذا تكتب وماذا تقول ومن أين تبدأ ومن أين تنتهى ؟ فالكتابة عن امدرمان صعبة كالنقش على مياه البحر .
0 فأمدرمان هى الأصالة والتاريخ والأمجاد والماضى التليد والحاضر الزاهر والمستقبل المشرق . وفى أمدرمان تجد الأمان وكل درر الزمان والمكان . امدرمان هى كررى الصمود التى تحدث عن رجال كالأسود الضارية . فيها بيت المال وعلايل ابوروف وودنوباوى برجالها وانصارها . فيها القلعة ببدورها وجوهرها وحي العرب والمسالمه وغزلانها . والفتيحاب بلد الركاب والنحاس والناس العزاز . وحى العمده وميدان الربيع وأسماك هاشم الشهية وكمان فيها العباسية قدح الدم وحاج بهويه وجعفر حسين وزيدان ابراهيم رحمة الله عليهم وفيها كمان محطة عابدين ورجال الدين .. وفيها ابوكدوك وود البصير والمظاهر والكوارته وامبده حمد النيل وود البشير . وامدرمان سوق العظمة واولاد مرين والعناقريب ودهب اولاد مله وتبيدى وسينما برمبل وحى البوسته وتعرج كمان للعرضه والأربعين . ولو ضج المكان ودرت الراحة والكيف تشرب شاى جورج مشرقى وتعود للبيت .
0 وفى امدرمان إنطلق الصوت الجهور الباتع ( هنا امدرمان إذاعة جمهورية السودان ) وكمان تلفزيون السودان واساطين الكورة الهلال والمريخ والمورده وفريق ريد البتلقى فيه كل الود والمحبة والريد واولاد الفيل وجزارة مارقيت
وكمان المسرح القومى الذى صعد عليه العمالقة من أهل الدراما والمسرحيين كانت ولا تزال لهم صولات وجولات .. ومنهم عثمان حميده ( تور الجر ) وخورشيد وخالد ابو الروس . الفاضل سعيد . محمد شريف على . مكى سناده . عبد الرحمن الشلبى . الجعفرى . الهادى الصديق . محمد السنى دفع الله . محمد نعيم سعد . فيصل احمد سعد . ابو قبوره . بلقيس عوض . فتحيه محمد أحمد . فائزه عمسيب . إخلاص يوسف . مختار بخيت الدعيتر وناديه احمد بابكر . منى الصادق . إخلاص نور الدين وربيع المبدع الوديع وكل الكوكبة العظيمة التى رحل البعض منهم الى رحاب الله والبقية الباقية التى لا تزال تواصل العطاء وسنوثق لهم جميعا بإذن الله .
0 اتوقف ها هنا اليوم ونواصل غدا بمشيئة الله ونتحدث عن بقية المناطق والاحياء العريقة والمؤسسات الحكومية والفنانين والفنانات والشعراء .
0 الى ذلك الموعد أستودعكم الله ونواصل إن كان فى العمر بقية .. وتعظيم سلام يا أمدرمان .
